Hei alle saman!
Midt i ei travel førjulstid er det viktig å trekke pusten og nyte ei fin morgonstund.
Dette er bilete frå Aurland i dag tidleg.
No går det fort i svingene!
Denne veka var det tid for å hente rein på nydeleg vinterfjell, og gler oss igjen over dei flotte slakta.
Heime har me fullt fokus for å kunna skjære, produsere og pakke så mykje som mogeleg til kvar einaste marknadsdag.
Ein har alltid hjarta i halsen når listene med bestillingar skal pakkast og fordelast mellom dei ulike marknadene, og vonar at sjekk og dobbeltsjekk gjer at me no er ajour!
Komande helg er den støreste helga i året når det kjem til førehandsbestillingar, og det gler oss at så mange ynskjer julemat frå Haugen.
No er “julebutikken” på nettsida stengt for bestillingar, og me tek ei oppteljing når alt er pakka slik at me har oversikt over kva me har att “som ikkje har namn på seg”.
Det me med sikkerheit kan sei, er at me vil så langt som mogeleg ha med oss av alle slag. Det vert noko fersk rein og hjort komande helg, me har att av pinnabog og fenalår, og at det sannsynlegvis vil vera nokre svineribber og noko pinnakjøt.
Julepålegget har me produsert opp att denne veka slik at det skal det vera rikeleg av dette i tida framover.
Me skal prøve å oppdatere dykk på status etter kvart.
Me ynskjer dykk alle ei framleis god førjulstid :)
Med von om smakelege opplevingar….
Kristine og Odd
Haugen Gardsmat