Då er me snart ute på vegen att og set kursen mot Bryggen i Bergen og Valkyrieplass i Oslo. Det vert tospannet Egil og Guttorm som kjem til Bergen. Odd tek med seg dotter vår Silje til Oslo, og der stiller også Tjeran og bidreg under marknaden. Sjølv vert eg i bygda denne helga.

Me startar levering av lunsj til båtar på Nærøyfjorden, bortimot 2500 kuvertar er bestilt i løpet av mai og juni så dette vert utfordrande! Då er det godt å ha kokken vår David med på laget!

Det er sjølvsagt med så mykje spekemat som me har klart å ha ferdig til mai-dagane i tillegg til både spanande rettar å ha på grill, i omn og i gryte.

Me nemner spesielt:

• Fenalår
• Spekepølse, både viltpølsa og chillipølsa
• Speka svinenakke og flatbiff
• Bacon
• Spareribs
• Kjeside
• Kjelår
• Skiva marinert lammelår (tips: pensle litt god honning på rett før du tek den av grillen eller ut av steikepanna, smakar kjempegodt!)
• Marinerte lammesider
• og for fyrste gong skal me ha med oss grillbog av lam. Dette er heilt utbeina bog til å krydre og ha rett på grillen. Med litt tålmod er dette eit knallgodt alternativ til lammelåret i skiver.
• Kjøttboller at ymse slag er sjølvsagt med, dei er også gode på grillspyd dersom du vil prøve noko nytt.

Bankterminalen vert med til Oslo denne gongen, beklagar dersom dette byr på utfordringar for dykk i Bergen, den vert med neste gong me kjem! Då ynskjer me dykk ei retteleg god helg og vonar at de finn vegen til Bryggen eller Valkyrieplass på laurdag.

Med von om smakelege opplevingar…

Kristine og Odd

Denne veka har gått fort. Førre helg var me på Finse og grilla i Lengedalen under Skarvarennet. Kjempekjekt å kunna bidra saman med Finse Røde Kors Hjelpekorps att. Både løparar og hjelparar gjorde sitt til at grillmaten gjekk unna. Norsk Fjellmatsenter gjorde også ein kjempejobb på Ustaoset og serverte fleire produkt frå oss på kvelden til inviterte gjester.

Denne helga vert det vår uunnværlege far/svigerfar Egil stiller for oss i Bergen. Han får hjelp av sønene våre Guttorm og Jon denne gongen. Odd hjelper til laurdag morgon, men så skal me på reis, både han og eg.

Me har førebudd litt for einkvar smak og anledning denne gongen:

• Lam – Skiva marinert lammelår, lammebiff, lammeklubber, lammesider
• Kje – Lår og sider
• Svin – Sparerib’s spesial.
• Kjøttbollar og karbonader
• Gardspate
• Bacon
• Spekepølser
• Nokre fenalår, har me ikkje nok, må me ordne med ei levering til Bergen før 17.mai slik at alle får!

Spesialtilbod denne gongen: SPARERIBS FOR GRILL ELLER OMN kr. 79,00 pr.kg (Hugs å seie frå, slik at de får rett pris av gjengen)

God helg til dykk alle saman, så snakkast me!

Med von om smakelege opplevingar…
Kristine og Odd

Etter ei fantastisk påske på Finse med mange og gode både matopplevingar og ski-opplevingar, har me no bretta opp ermane og er klare att til ny marknad i Oslo komande laurdag på Valkyrieplass (10-17). Kristine skal denne gongen bruka helga saman med ungane i det me deltek i dugnaden det er når Aurland skyttarlag skal arrangera ”Vårtreffen” saman med Knipenborg og Lærdal skyttarlag. Det vil difor vera Tjeran og eg som skal ha hånd i hanke denne gongen.

Handelsforeningen i og rundt Bogstadveien arrangerer denne dagen også ”Bilfri dag”, der svært mange nyttar bilfrie gater til å flytta butikken ut i friluft og dermed verka til skikkeleg marknadsstemning. Denne gongen har me med ferskt kje-kjøt i form av lår og grillribber, lammekjøt i form av lammebiff, indrefilet,mørbrad, lammeklubber, skiva marinert lammelår , marinerte lammesider, lammeskankar og reinsdyrskank av reinsdyrkalv. Ettersom grillsesongen nærmar seg har me og med marinert svinenakke i skiver av frittgåande gris og sparerib’s spesial. Sistnemnte er ferdig steikt i vakuum og treng berre kort tid på grill eller i omn. Kan anbefalast! Elles har me sjølvsagt med kjøttbollane våre, karbonadar, tørrsalta bacon, spekepølser av rein, chili pølser (spekepølse) og fenalår.

Av dei opplista produkta over vil me særskildt anbefala alle dykk som ikkje har testa dei før følgjande produkt: Lammesider, Spareribs spesial, Grillribber av kjè, lammeskank og reinsdyrskank. Som de ser har alle desse fire produkta det til felles at dei til vanleg vert definerte som ”uedle stykningsdeler”. Dette betyr at dei har eit relativt høgt innhald av bindevev (sener og hinner). Dette tyder at dersom desse delane ikkje vert handterte rett, vil bindevevet gje ei heller semmer oppleving. Trass dette ligg det ikkje noko hokus pokus i å få til eit godt måltid av desse varene. Alt som krevst er varmebehandling på lave temperaturar over lang tid evt. ei forsteiking med damp. (Dette gjer ein med gryte/ rømertopf i omn, evt med langpanne og folie).

Mange av dykk har høyrt oss tala om dette fleire gonger på marknad. Dette er av di me vonar fleire og fleire skal få oppleva den fantastiske smaksrikdommen dei ”uedle” stykningsdelane kan gje. Behandla rett, vil ein i tillaginga bryta ned bindevevet til collagen. Sener og hinner vert dermed enkelt sagt omdanna til ei form for gelatin. Effekten av dette er saftig, møyrt og fantastisk smaksrikt kjøt. På den sørlege halvkula er det mange kjende og ukjende ”Bar-B-Q nasjonar” som til fulle har oppdaga dette. Kjem ein til Argentina, Brasil og Sør Afrika til dømes, er det ikkje sjeldan ribber av ulike dyr som dannar grunnlag for festmaten frå grillen. Me vil difor med dette oppmoda dykk alle til å prøva dette. Kanskje kan dei gje dykk meir nyting enn dei ’edle’ deler kan J.

Her er ei enkel oppskrift på tilberedning av lammesider, denne kan også nyttast til kjesidene:

Sparerib’en er allereie ferdig varmebehandla så denne treng ikkje noko oppskrift. Sørg berre for å få ei fin steikeskorpe før servering. Vonar me sjåast på marknaden. Både Tjeran og eg skal gjera vårt beste med råd og vink for dei som måtte ynskja det.

Med von om smakelege opplevingar…
Beste helsing Odd

Fyrst må me takke dykk, takk for engasjement og entusiasme de syner både på marknader og i tilbakemeldingar til oss! Ris og ros er viktig for at me heile tida skal kunne verte betre og få visse om at me er på rett veg.

Dette er ei gledeleg tilbakemelding me fekk no måndag:

Min kone hadde bursdag på lørdag og jeg stilte opp med langtidsstekt surret lammesteik fra Haugen Gardsmat og en god rødvin. Kjøttet var helt utrolig bra! Helt klart det beste lammekjøttet vi har spist! Takk skal dere ha for deres bidrag til en vellykket feiring

Tusen takk for gode ord!

Så var det allereie torsdag og i morgon gjer me siste førebuingane til marknadene i helga.

Fokus er sjølvsagt på lam og kje no rett før påske, men me tek også med bollar, leverpostei, bacon og fenalår. (Det er så vidt med noko viltkjøt også)Spekepølsene våre har vorte svært populære og me har ikkje klart å produsere nok i kvar omgang til å ha med oss dette denne helga. Dei heng enno i modninga og treng litt meir tid før dei er klare.

Her i Flåm vårast det no og dei fyrste lamma er allereie født på Brekke. Det er alltid kjekt å følgje søyene og lamma etter kvart som dei kjem. Odd er elles ei lita runde til støls i kveld, men kjem seg ned att i morgon og stiller saman med Egil på Bryggen på laurdag.
Eg kjem til Oslo og tek med meg eldste guten vår, Guttorm. Tjeran, vår gode hjelpar, vert også å treffe på Birkelunden.

Me snakkast!

Med von om smakelege opplevingar…
Kristine

Kjøttbollar på grillspyd, enkelt og godt!

Hei alle saman,

Så skal me prøve å vende nasen austover att. Akkurat no er det regn og vind i Flåm, kryssar fingrar for at fjellet er ope!

Takk til alle som var innom på Vulkan. Me beklagar at me ikkje klarte å ta høgde for den store oppslutnaden og dermed gjekk tom for viktige varer alt for tidleg. Me vonar at me kan ta det att denne helga.

Me har med oss:

• KJE lår, side og spekje
• LAM skiva og marinert lammelår, klubbe, skank, biff og steik
• VILT nokre steiker og nokre edeldelar
• KJØTTBOLLAR, alle tre typar, litt karbonade
• BACON, engelsk type
• VILTSPEKEPØLSE
• FENALÅR

Marknaden byrjar 10.00 og varer til 16.00. Det vert far min og eg som reiser denne gongen. Odd skal levere lokalmatbuffet til eit cruise på Sognefjorden på laurdag.

Med von om smakelege opplevingar…
Kristine og Odd

Då er me i ferd med å klargjere for stor event i Oslo denne helga. Mathallen Vulkan har invitert til Forsmak som skal opnast av fylkesmann Valgerd Svarstad og kokken Bent Stiansen klokka 12.00 i morgon.

Dette ser spanande ut, både fordi det vert mange deltakarar frå Bondens Marked, også frå andre stader i landet, og på grunn av spanande program gjennom begge dagar. Dersom du klikkar deg inn på www.vulkanoslo.no finn du programmet ved å skrolle nedover på framsida (under liknande bilete som i e-posten her)

Me kjem til å ha med oss eit mindre utval denne gongen enn det de er vande med, grunnen er at skal alle få plass, vert det lite areal til kvar produsent. Det har vore naudsynt å prioritere knallhardt, men dette må me prøve å få plass til:

• Kjekjøt (lår, bog, småkjøt)
• Lam (steik, klubbe og flatbiff)
• Rein (Ytrefilet, entrecote og steik)
• Gardspate
• Kjøttbollane våre
• Tørrsalta bacon
• Spekepølser, både reinspølsa og chilipølsa
• Fenalår

Me er litt ’anonymisert’ denne gongen, nytt opplegg gjer at me ikkje kan ha med skiltet, de finn oss på stand nummer 8, i ei ende mot sitteområdet.

Me gler oss og kryssar fingrane for at vareutvalet fell i smak og at me har nok til alle!

Med von om smakelege opplevingar….
Kristine og Odd

Me har med oss:

• Saltkjøt og Ljøsdalskorv. Har du poteter og kålrabi er middagen i boks
• Noko fårikålkjøt, kan lett nyttast til lammegryter også dersom tradisjonell fårikålmiddag ikkje er fyrsteval.
• Lammeklubber, dette kjenner de godt til. Rett i ovnen. Sjysaus, gode poteter og grønnsaker så er søndagsmiddagen klar.
• Fersk kjekjøt frå Undredal. Spanande oppskrifter frå gode mat-entusiastar finn de på nettsidene våre.
• Noko viltkjøt (hjort og rein)
• Kjøtbollane våre: Viltbollar, lammebollar, viltkarbonader (no også prøvd av Berlinarar) og for ikkje å gløyme tapasbollane som for mange har vorte ein favoritt.
• Gardspatè. Endeleg, no har me fått steikt opp ein del og tek det sjølvsagt med til Bergen!
• Bacon, tørrsalta og lett orerøykt.
• Spekepølsene våre: Viltspekepølse av rein og svin. Chillipølse av svin.
• Fenalår

Takk igjen til alle som har bidrege med oppskrifter. Me tek gjerne imot fleire både på både kje og andre produkt dersom de har tid og lyst!

God helg alle saman, så vonar me at me sjåast på Bryggen!

Med von om smakelege opplevingar…
Kristine

Varelevering på Finse, med innlagt skitur

I desse dagar får me att sola på tunet i Haugen, til glede for både to og firbeinte. Me har snøkvite liar og bøar enno og skiene har fast plass på trappa slik at dei skal vera lett å gripa til. Det har vore ei travel januar for oss men mange leveringar til mellom anna Dr.Holms, Fjellmatsenteret, Finse 1222, Solstrand, Hanne på Høyden og Potetkjelleren. Me set pris på at dei nyttar varene våre til smakfulle rettar som kjem mange til gode.

Marknadssesongen startar opp att denne helga og me gler oss til å sjå dykk att på marknadane utover vinteren og våren. No laurdag 18.02. finn de oss i Oslo og Birkelunden 11.00 til 16.00. Neste helg snur me vestover og kjem til Bryggen i Bergen.

Me har blant anna med oss:

• Nyslakta (mobilslakt) kje frå Undredal, ikkje så mykje som me hadde håpa, men er du tidleg ute har me både lår, bog og småkjøt.

Takka vera gode mat-entusiastar finn du flotte oppskrifter på kje på nettsidene våre. Her kan ein finna idear og tips til nye måtar å kokkelera med kje som utgangspunkt.

• Saltkjøt, lam
• Fårikålkjøt, lam
• Lammesteik og noko flatbiff og mørbrad
• Lårsteik av rein og hjort, nokre edeldelar
• Bacon
• Spekepølser, som akkurat vart klar til marknaden
• Fenalår
• Viltboller
• Lammeboller
• Viltkarbonader. Ja, same type som var med til Berlin med stort hell

HUGS: Tar de med ei utskrift av e-posten gjer me dykk ei ekstra hyggeleg pris. Det er lov å dele dette også med matglade vener og kjende! Odd er ikkje med denne helga, men som de veit, stiller far min sporty opp, og vert med til Oslo.

God helg til dykk alle, så snakkast me!

Med von om smakelege opplevingar…
Kristine og Odd

Me ynskjer å takke dykk alle for året som no er på hell og ynskje dykk ei riktig god jul og eit godt nytt år.2011 har vore eit over måte travelt år i Haugen og me gler oss over alle gode ord og smakfulle rettar rundt bord i mange heimar og festelege lag.

Golv er vaska og ved komen i julepynta hus. Pinnakjøtet er i rute og julegrøten snart komen på kok, så no skal me kose oss saman med familie og vener desse juledagane.

Me ynskjer dykk alle ei fredeleg jul, så snakkast me på nyåret!

Med von om smakelege opplevingar…

Kristine og Odd
Haugen Gardsmat as

Her er eit bilete av ein smakfull tallerken ytrefilet av rein. I Haugen vert det rein frå Filefjell i nyttårshelga.

(På www.matprat.no finn de oppskrift)

Då er me komen til siste helga men marknad for i år. Denne veka har vore ekstra travel med rein og hjort i tillegg til siste runde med julepålegg. Me tek med oss så mykje me kan til Oslo og stiller tidleg på Valkyrieplass slik at me skal vera klar når de kjem. Me kryssar fingrane for at alle bestillingar er kome med og at alle vil verte nøgde med utvalet denne helga.

Elles vert det levering av rein og andre bestilte varer til Bergen til veka, dersom alt går etter planen kjem me onsdag 21.desember. Då tek me kontakt for å avtale hentestad. I Bergen skal de elles finne både fersk rein og julepålegg hjå Kvamme Kolonial og Fetevare på Strandkaien i tillegg til at me har varer hjå Safari-butikkane.

Me ynskjer alle ei retteleg god helg!

Med von om smakelege opplevingar…

Kristine og Odd