haugen-header

Arkiv | Nyhetsbrev

Sesongens siste Bondens marknad

Heisann alle saman.

Då er det veldig snart helg, og Haugen Gardsmat skal delta på Bondens marknad både i Oslo og i Bergen. Dette vert dei siste markandsdagane for vår del, før haustsesjonen tek til.

I Oslo vert det marknad på Valkyrieplass i morgon laurdag (10-16) og i Botanisk hage søndag (11-16). Her vert det Kristine og Odd som representerer.

I Bergen er det denne laurdagen den berømmelege «Torgdagen», med mykje hurlumhei i heile byen. Marknadsplassen er difor flytta frå Fisketorget og over på Bryggen. Ver merksame på at marknadsplassen vil vera delt i to av ein av ute-serveringane på bryggen. De vil finna oss i delen lengst nord (Mot SAS-Hotellet).

I bygda har no våren nesten heilt sikkert komen. Snøsmeltinga er komen over 1000m, og sauebøndene har «buført». (flytta Sauenbe til fjells) Kanskje er me no inne i den finasste tida her i Sogn: Grøne bøar og lier, Blåe elvar og fjordarmar og framleis snødekte fjelltoppar. Ikkje rart turistane kjem i tusental J

I sortimentet denne gongen: Indre og ytrefilet av lam, indre og ytrefilet av rein, skiva marinert lammelår, Kjøttfulle grillbein sousvide, tomatsuppe, kjøttbollar, bacon og spekemat mm.

På bryggen i Bergen vil det og verta høve til å kjøpa ferdige hamburgerar av hjort, servert med spesialbrød produsert for oss av vårt lokale bakeri.

Dersom de tek med utskrift av nyhendebrevet, vil de få 10% rabatt på alle varer J

Vonar mange av dykk har høve til å ta turen innom for triveleg prat og god handel.

Med von om smakelege opplevingar
Beste helsing
Kristine og Odd Haugen Gardsmat

Bondens marked Bergen

Hei alle saman

Denne gongen måtte me prioritere hardt, sidan det er mange jern i elden for tida. Guttorm, Silje og Jon; komplett syskeflokk; stiller på marknaden i Bergen mens me andre har ulike gjeremål denne helga.

Tida har gått særs fort, og etter påske har me som vanleg stilt med mat til Røde Kors og deltakarar på Skarvarennet inni Lengjedalen. Kontrastane kan vera store på denne tida av året, og her hjå oss har me kvite fjelltoppar og ypparleg skiføre, mens det nede i dalen grønkast. Sau og lam er komen ut på beite alt og me gler oss over nytt liv.

Me det flott været som no er kome over oss er det fokus på grilling, også i Haugen. Me har difor med oss: Ferskt lammekjøt med lammefiletar og skiva lammelår for grillen, Kjøttfulle grillbein, Reinsdyrbiff, Kjøttbollar, Bacon og spekemat.

Ynskjer dykk alle ei strålande helg!

Med von om smakelege opplevingar…
Kristine og Odd Guttorm, Silje og Jon

Marknad tre helgar på rad! Fisketorget i Bergen 25.mars og 8.april. Valkyrieplass i Oslo 1.april

Hei alle saman

No gjer me oss klar til marknad, tre helgar på rad. Ei skikkeleg oppkøyring til påske! Vinteren har vitja oss att litt her, og på fjellet vonar me på flotte forhold i tida framover; sjølv om me nede i bygda ser etter vårteikn.

Med påske kjem fokus på kje og lam og me tek med oss dette i så stor grad som mogeleg dei neste helgane. Me er heldig å ha god hjelp i den yngre generasjon, og dei stiller opp både i Bergen og Oslo for at me i større grad kan arbeide saman med utviklingsprosjekt her heime.

På bilen desse helgene har me med oss:

KJELÅR, KJERIBBE OG PAKKAR MED GRYTEKJØT AV KJE. LAMMELÅR -skiva og marinert. LAMMESTEIK, KLUBBE OG SKANK. NOKO YTREFILET OG SALTA LAMMEBOG. -og som mange har fått med seg, leverer me ein del varer til Adams Matkasse. Også ein del varer som de ikkje heilt utan vidare forbinder med oss. Det som er fellesnemnaren for desse produkta er at dei, akkurat som alt me produserer, er heilt naturlege og utan kunstige tilsettingar, Etter oppmoding frå kundar tek me difor med oss TOMATSUPPE i pakningar som passar for 2-3 personar.

Elles er det sjølvsagt med både kjøttbollar og karbonader, bacon og ein del spekemat som fenalår, speka krydderbiff, chilipølse og speka svinefilet med 🙂

Då vonar me at de får smakelege opplevingar…
Med helsing
Kristine og Odd, Guttorm, Silje og Jon

Sesongåpning på Bondens Marked

Hei Alle!

Då er me komne på att med ny sesong på Bondens Marked. Dagane har vorte litt lysare, så til tross for den siste snøen som kom, så ser me at våren er i anmarsj. Det skal difor vert kjekt å treffa att både kollegaer og gode kundar både i Oslo og i Bergen.

Denne gongen skal gutane våre Guttorm og Jon ta turen over fjellet. Dette vert fyrste gong i Oslo på eigen kjøl for gutane. Meir som ein liten ekspedisjon J Med litt hjelp frå Oliver, så reknar me med at alle skal få god hjelp (og at dei finn fram til Valkyrieplass).

I Bergen vert det Silje og underteikna som skal representera. Det er (for) lenge sidan eg har vore med på marknaden i Bergen no, så det skal verta særs hyggeleg å treffa alle dykk som har høve til å ta turen denne helga!

Me er no midt inne i kjè – sesongen, så sjølvsagt har me kje med i ulike variantar: Spè-kje/ Grill-kjè ( kuvertstykker av kje til gryte/ steiking i omn), Kjè-ribber og kjè-lår.

Av lam har me ytrefilet, skiva marinert lammelår, lammeklubber.

Vilt: Kjøttdeig av rein, Ytrefilet av rein, mørbrad av rein.

I tillegg har me med kjøttbollar, bacon, spekemat (Fenalår/ speka krydderbiff), Haugakallens spekepølse og chilipølse.

Som sikkert ein del av dykk har fått med seg, så leverer me no regelmessig produkt til Adams Matkasse. Dette inkluderer ein del grønsaksbaserte rettar som tomatsuppe og potetstappe. Me har denne gongen med litt av begge desse produkta, som berre skal varmast før konsum, gjerne i embalasjen dei kjem i.

Dersom de skriv ut denne eposten, eller tek ein skjermdump av han, så vil de få ein særskildt god pris på denne marknaden. Det er og slik at me vil setta stor pris på alle tilbakemeldingar, både ris og ros. Dette er heilt nye produkt, så kanskje det er rom for forbetringar?

Vonar me sjåast!
Med von om smakelege opplevingar,
Beste helsing Kristine og Odd

Siste helg med marknader før jul!

Finse 14.12.2016

Hei igjen alle saman!

Då er det siste innspurt i Haugen før jula brått er over oss. Årets siste julemarknad for Bondens Marked i Bergen er no laurdag 17.desember. I Oslo er Guttorm og Oliver allereie i gang på Valkyrieplass der det er marknad fram til og med laurdag. Søndag er det marknad på Bærums Verk.

Resten av gjengen førebur helga og kjem med ferdig pakka bestillingar både til aust og vest. Me fintel pinnakjøt av lam og gimmer, svineribbe, pinnakjøt av rein og korv til bestillingar i dag og det ser ut som me skal kome i mål -med knappast mogeleg margin. Når det gjeld heile og halve reinsslakt ferdig partert er listene klare, og me tek som avtala med oss til marknaden laurdag både i Bergen og Oslo. Som i fjor vert det med nokre ekstra kassar, slik at det skal vera mogeleg for dei som forsømte fristen å få fersk rein i hus 🙂

Alt me har hatt sjans til å produsere vert rettferdig fordelt mellom aust og vest og me tek med oss: Stykningsdelar av fersk rein og hjort, filet og steik; nydelig fersk svinekjøt frå eigne frittgåande griser, medisterkaker, lammerull, sylte og gardspatè. Det vert plass til litt bacon, spekepølse og kjøttboller. Me tek også med oss fenalår, ypperleg til julesnacks, buffet eller julegåve.

Me ynskjer dykk alle gode dagar midt i julestria 🙂

Med von om smakelege opplevingar…
Kristine og Odd
Haugen Gardsmat

Julemarknadshelg for Haugen Gardsmat

Hei alle saman

Godt det er fyr i omnen! I skrivande stund regnar og stormar det så det tek i huset, skikkeleg mørkt og kaldt på morgonkvisten.

I produksjonen er me greitt i rute, og planen er klar for markandane dei komande dagane: Odd og Kristine reiser austover, til marknad i R5 for tilsette i LMD mm (regi av Hanen), Birkelunden laurdag og Bærums Verk sundag. I Bergen trassar Silje og Morven vær og vind saman med Metika, og skal så godt dei kan, prøve å halde marknaden open på laurdag. Det har vore diskusjonar i BM Bergen i høve været som er venta, men ein er einig om å prøve å halde ope på laurdag som annonsert. Vert det endring på dette, sender me ut beskjed til dykk alle gjennom facebook og om mogeleg på e-post.

Me må verkeleg prioritere kva me kan ta med oss av utval denne helga og hovudfokus vert på julevarer, fersk hjort, og ferskt kjøt av reinsdyrkalv frå Filefjell. Er det noko de saknar, kan me ta det med oss ved neste høve.

Me hastar vidare, og ynskjer dykk alle ein retteleg god dag!

Med von om smakelege opplevingar…
Kristine og Odd
Haugen Gardsmat

Julemarknadar over ein lav sko :-)

Aurlandsfjorden

Aurlandsfjorden

Hei alle saman!
Då er me komen inn i adventstida, og for oss, som for alle andre, er det knapt med tid for å verte ferdig med alt ein ynskjer før julefreden kan senke seg.

Haugen Gardsmat skal delta på Bonden Marked i Bergen, Oslo og Bærums Verk framover etter denne planen:

Fisketorget i Bergen klokka 10.00-16.00 alle laurdagar

  • Laurdag 03.12 (utlevering av privatbestillingar etter avtale)
  • Laurdag 10.12. (utlevering av privatbestillingar etter avtale)
  • Laurdag 17.12. (utlevering av privatbestillingar og rein denne marknadsdagen)

“AUSTAFØRE”

  • Laurdag 03.12 Valkyrieplass kl.10.00-17.00
  • Sundag 04.12. Bærums Verk kl. 12.00-18.00
  • (R5 Fredag 09.12. kl.10.00-14.00)
  • Laurdag 10.12. Birkelunden kl.10.00-17.00
  • Sundag 11.12. Bærums Verk kl. 12.00-17.00
  • Onsdag-Fredag 14.-16.12. Valkyrieplass kl.12.00-18.00
  • Laurdag 17.12. Valkyrieplass kl.10.00-17.00
  • Sundag 18.12. Bærums Verk kl.12.00-18.00

No vert det stort fokus på jul! Me har med oss pinnakjøt (både røykt og urøykt), svineribbe (frå og med helga 9.-11.12), pølse og medisterkaker. Julepålegg som lammerull, sylte, juleskinke og gardspatè. Vidare har me fersk hjort. Rein kjem til på siste marknadshelga. Me kjem nok ikkje utenom å ha med bacon,litt spekemat og kjøttboller heller, men må prioritere plass til dei andre varene akkurat no før jul 🙂

Noko du saknar? Me prøver så godt me kan å få med oss bestillingar til kvar helg me er av garde.

God helg folkens, sjåast på marknad 🙂

Med von om smakeleg oppleving…
Kristine og Odd
Haugen Gardsmat

Årets første Julemarknad!

Reinunga

Reinunga

Hei alle saman!

Det stundar mot helg att, og me siktar oss inn på nye marknadsdagar. Denne helga er det marknadar både i Bergen og i Oslo. I Bergen sjølvsagt på Fisketorget. I Oslo skal me vera på Kolbotn Torg på laurdag og på Bærums verk med julegateopning og tenning av julegrana på søndag.

Her vestpå har me no definitivt komen over i vinter, der det snøar i fjellet og regnar i bygdi J Dette er me vande til. Likevel vert det litt spanande å sjå korleis det vil gå når me skal over fjellet. Metrologen på radioen i dag ville ikkje verta overraska om det kom opp mot ein meter med snø enkelte stader. 22 sekundmeter på fjellet store deler av dagen para med stort snøfall kan verta utfordrande. Me satsar på at «alt ordnar seg for kjekke gutar og jenter», og startar turen litt ekstra tidleg.

Som førre helg er det julematen som dominerer. Pinnekjøt både røykt og urøykt, julepølser av ulikt slag, medisterkaker, lammerull, sylte, leverpostei mm. I tillegg har me biffar og filetar av hjort og lam, samt kjøttboller, bacon og spekemat.

Me får inn ein heil del bestillingar på e-post, og prøver så godt me kan å følgje dette opp. Dersom de ikkje har fått svar på bestillinga dykkar, må de vera venleg å gje oss ein lyd! Me har også mogelegheit til å notere ned bestillinga di på marknaden med det nye systemet vårt.

Då ynskjer me dykk alle ein god kveld, og vonar me sjåast på marknad!

Med von om smakelege opplevingar…
Kristine og Odd
Haugen Gardsmat

Marknadar på Valkyrien og Birkelunden

Hei Alle!

Då er me klare for fredagsmarknad på Valkyrien i dag, og nytt Bondens marked i Birkelunden i morgon. I dag er me på plass mellom kl 12 og kl 18 I morgon er det som vanleg frå kl 10-16.

image006image002

Som de ser av bilda forsøker me oss i dag på eit litt nytt oppsett. Fint om dei av dykk som har høve til å stikka innom i dag kan gi ei lita tilbakemelding på kva de tykkjer om funksjonalitet mm.

Denne helga, som førre helg er det Lam, (vill) Hjort, Bollar, Bacon, Spekemat, Pinnekjøt og Julepålegg (sylte, rull, mm) som er med. Sosekjøtet av hjort som me har med denne helga er eit nytt godt produkt, som er enkelt å tilbereda:

Brun godt i jerngryte, tilset væske og rotgrønnsaker + eit laurbærblad. Set gryte med lokk i omn på 180 grader i 1,5-2 timar. Kjøtet er feerdig når det løsnar frå beinet. Lag saus på krafta, og nyt potetar og gode rotgrønnsaker til, evt soppstuing. Maten lagar seg nesten sjølv.

Oliver, Guttorm og Kristine bemannar boden, og vil gjera sitt beste for å hjelpa dykk. Vonar mange har høve til å stikka innom.

Ha ei god helg!

Med von om smakelege opplevingar
Helsing Kristine og Odd
Haugen Gardsmat

Winter is coming

Hei alle saman!​

Snø og minusgrader har sett sitt preg på landskapet, og me kjenner på oss at vinteren er i annmarsj og plutseleg var det ikkje lenge att til jul! Pinnekjøt, påleggsproduksjon, jakt og slakt er i god gjenge og me set inn eit ekstra gir framover for å få alt klart.

Denne helga er det Guttorm, Silje og Metika som styrer marknaden i Berge, mens Jon og morfar Egil reiser til Oslo. Odd og eg pakkar sekken og med børse over skulderen tek me i ettermiddag fatt på oppstiginga til stølen og siste jakthelg saman for oss i år. Generelt har det vore ein god jakthaust med mykje godt vær for mange, me kan difor glede oss over fersk hjort også til marknaden denne helga.

Bilene vert i skrivande stund lasta, og med på bilen er: Ferskt lammekjøt, ferskt hjortekjøt, kjøttbollar, bacon, spekemat samt ein liten smak på julematen. Me har med Pinnekjøt røykt og urøykt, Korv, Lammerull, Sylte og Gardspatè.

Då ynskjer me alle ei retteleg god helg, så finn de flotte representantar frå familien både i aust og vest.

Med von om smakalege opplevingar…
Kristine og Odd
Haugen Gardsmat

Wordpress nettside laget av Oransje webdesign